Esther op’t Rode Sofa
6. März 2014
An’n 20. Dezember seet Esther Bejarano, Vörsittersch vun’t Auschwitz-Komitee, op’t Rode Sofa bi DAS in’t NDR-Feernsehn. Se vertell över ehr Beleevnisse, klor, ok vun Auschwitz, un wat för en grote Rull de Musik in ehr Leven spelen dä. Un de Musik hett ehr vör’n sekern Dood bewohrt, domools, as se in’t Deerns-Orchester vun Auschwitz spelen schull. Köttens weer se 89 Johr oold worrn, un ehr wörr ok groleert. Bi de Geschenke, de se kregen harr, weer ok en kussechten Lippenstift. Dor mutt sik de gode Esther düchtig gebumfidelt feuhlt hebben. hjm
